「原來做人可以攰到拖都唔想拍」 精選

　　「搵返個啦，你都散咗咁耐。」一個老死搭住佢膊頭。
　　「仲搵？而家我連打機都冇精神啊。」佢苦笑兩聲，擰哂手咁拒絕老死嘅建議。
　　「我同女朋友行依邊，走先啦。」
　　「再聯絡。」
　
　
　　舊同學聚會散場，同老死又喺分岔口分開行，依一刻得返佢自己一個。冇半點孤獨，冇半點難過，佢只係覺得好攰，攰到連負面情緒都冇能力去浮現。一個人有幾空虛寂寞凍，拍拖有幾開心幸福，對佢嚟講都唔再重要，返正單單星期日夜晚出嚟食個飯大家飲兩杯，未散場佢已經覺得好攰，唔想再諗咁多。　
　
　　細個可以為咗打機一早起身由朝打到晚，比啊媽鬧先肯去瞓；後生可以同朋友去玩去蒲兩晚唔瞓都當作等閒；以前為咗女朋友晚晚傾電話到兩三點先肯收線。而家放工返到去食完晚飯，飯氣未攻心已經唔想再郁，就算朋友叫佢放工出嚟食個飯聚下，都要睇下嗰日嘅精神夠唔夠佢挨到十二點先返到屋企。你以為佢好老啦咩？其實仲有幾年先係而立之年。
　
　
　　佢自問未到慘嘅地步，雖然人工唔係幾萬一個月，但都夠佢一個人比完家用都仲有閒錢買下衫耐唔耐飲下酒仲可以儲返小小，反而係就算洗得起錢，更多時候係有時間佢都寧願瞓多一陣而唔係出街買嘢。拖唔係冇機會拍，不過就算有女仔約佢出街佢都會搵理由推，當然一部份原因係個女仔唔係佢杯茶啦，但更重要係佢覺得平時已經好攰，佢唔想再花精神喺同人行街睇戲食飯身上。衰啲講句，就算有機會食散餐，嗰晚搞完就可以唔再聯絡，佢都想放棄依個人地口中嘅大好機會。　
　
　　其實佢都想拍拖，佢都想有人會比驚喜佢等佢放工，放假大家出去玩吓放鬆吓。不過喺香港返工真係好攰，走一個同事就要頂堆佢啲嘢嚟做，OT都係打工仔一定要面對嘅無奈；放假出街又嘈又多人，銅尖旺大型商場人迫人唔在講，西貢長洲一樣好似年宵花市咁爆。想搵個地方好好放鬆？享受拍拖嘅情趣？真係要講句葉師傅唔係咁易。
　
　
　　以前嘅佢會覺得寧願瞓少啲都要去玩，而家佢寧願瞓多個鐘都好過出街遊。原來做人真係可以攰成咁，原來一個人真係可以攰到唔想拍拖，比著五年前嘅佢，打死都唔信自己會有咁嘅一日：唔係話拍拖之後嘅洗費令人頭痛，而係拍拖要用嘅時間、精神，甚至係拍拖本身對佢嚟講已經係一種奢侈品。
　　
　　可能你會覺得我講嘅佢好熟口面，又或者你會覺得我講緊嘅根本就係你。傻啦，生活喺香港，會咁樣諗係正常不過嘅事，攰嘅又點止我同你？
　
　
FACEBOOK：https://www.facebook.com/MOYINDAY
TUMBLR：http://moyinday.tumblr.com/
Fanpiece：http://women.fanpiece.com/moyinday/
Medium：https://medium.com/@moyinday