《別讓發聲變成狼來了》

毛言地 於 03/12/2017 發表 收藏文章
  寫依個話題之前我要拎一拎定頭盔:我冇話邊個講真邊個講假,只係突然咁多人企出嚟話比人性侵過,真係有種狼來了嘅感覺。
 
 
  呂麗瑤話比人性侵犯依件事動全城可能係受之前荷里活嘅影響造成。一個女仔喺自己生日嗰陣決定將心結講出嚟,指證又好發洩又好,我都覺得係一件好事:你想惡有惡報,都要受害人首先勇敢指證。不過當發聲得到廣大市民留意然後紛紛留言支持之後,「被性侵」突然好似有另一個作用咁。可能係我主觀,可能係我性別定形,但一個女仔訴說自己比人性侵犯嘅經歷,理應係有種盡訴心中情嘅釋放,例如自己其實好驚,但細個驚到唔識反應;或者係侵犯者有權有勢,自己唔識點反抗。至於依頭話自己試過唔止一次,嗰頭又好冷靜咁分析法律觀點,又強調因為喺大陸發生所以法律咩都做唔到,我希望因為事主真係女強人,睇得開放得低而又用平常心去提醒其他女性,所以可以寫得咁冷靜。
 
 
  性侵犯係一個好嚴重嘅罪行,我有前度都曾經經歷過。依啲係不堪回首嘅悲劇,我地每個人都應該盡力阻止性侵犯嘅發生,除咗識得大聲叫唔好,更重要係自己唔好成為侵犯人嘅一方。有人主動企出嚟講返事實出嚟當然可以比到侵犯者一個警號:受害人唔係淨係識得啞忍,你終會有被審判嘅一日。但我怕嘅係有人會將「企出嚟」當係一種風氣,甚至一種潮流,然後喺巴士比人望兩眼又當性侵,前男友「𡁻完鬆」又當性侵,甚至係一夜情完後悔又當性侵。就好似狼來了一樣,當大家聽完一次又一次就會麻木,就會當所有人都係「你以為比人性侵啫」,到時真正曾經受到性侵犯而企出嚟但又冇人信嘅受害人唔單止得唔到平反,甚至要受多次比人當講笑嘅傷害。
 
 
  你可以話我杞人憂天甚至太陰謀論,但睇返之前結唔成婚告返13年前13歲同個男人搞嘢,仲有N單發生喺時鐘酒店嘅促膝談心強姦案等等,我真係好怕「被性侵犯」會比好多人用嚟呃Like,甚至誣告其它人等等濫用嘅情況,然後令到真正受害人成為狼來了下嘅犧牲品。
 
 
  我始終認為性侵犯係發生喺好多唔同嘅圈子之中,總有人會利用唔同嘅權力或者信賴去威迫利誘男男女女,等自己可以享受一時快感,受害者甚至講緊係數以千萬計。當社會因為一條導火線而引起世界關注唔同界別嘅性侵風氣,我希望嘅係受害人可以乘機企出嚟指正犯罪者等佢得到應有懲罰,而唔係比其他人炒作自己嘅人氣。
 
 
  你玩緊嘅,好可能係幾千萬人終於等到嘅希望。
 
 
一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday
圖片來源:網絡取材
標籤: 毛言地  性侵犯    女性  

留言


請按此登錄後留言。未成為會員? 立即註冊
    快捷鍵:←
    快捷鍵:→