其實MK妹真係唔錯?

毛言地 於 15/04/2016 發表 收藏文章
  喺我印像當中,比人話得係MK妹都唔係一件好事。

  一身旺中打扮(而家旺中都半收皮,可能變左葵廣打扮)、可能有個唔知代表乜嘅紋身、一頭金毛(或者而家興咩銀河色)、高過5CM嘅鞋、再加一支黑冰,咁樣就成為左一個MK妹基本打扮。雖然MK妹膚淺、通常冇腦、仲通常成日講粗口。但喺依個開始將真性情當寶嘅香港嚟講,MK妹其實真係唔錯,特別係將佢地同一般港女相比之下,我覺得佢地有好多更優勝嘅地方。

  首先MK妹嘅要求好簡單:得閒就同佢行下MK,食飯就食爭鮮(明將收左皮後溝MK妹的確貴左),買衫又好小要名牌,旺中葵廣搞掂哂。到佢生日你送個沙律袋比佢都開心到放上FB哂幾日命。以上嘅嘢你好難同你個港女女朋友去做,因為佢九成會黑你面。日本嘢冇元氣級數以上佢根本食唔落口,買衫要落IT,最低限度都要瑞典大牌子(好為你著想架喇),手袋要G OR B字頭,當然H就最好。喺依個生活水平咁高嘅香港,你拎住雞碎咁多嘅糧想拍拖,港女你根本無力負擔,反而MK妹都仲叫有啲機會。

  唔好以為我講到咁就代表MK妹係次貨。大家咁想搵一個肯陪你挨嘅女朋友,MK妹就係最好人選:佢肯返工搵洗費自己用、你接佢放工已經係最SWEET嘅拍拖活動、唔介意你住公屋都會成日上嚟、唔介意買埋外賣上嚟(包括埋佢自己)、唔介意你成日打機(因為佢會喺你格離煲劇)、唔會要你戒煙(因為佢食埋一份)。咩叫可以做番自己嘅戀愛?我諗你同MK妹拍拖就可以做到。你就係佢生活嘅中心點,佢唔介意用佢嘅青春浪費喺你身上,甚至願意為你寫詩,好似咩「你的拳頭只為我而硬,我的水只為你而流」之類,真係連我都甘拜下風。試問人生得一MK女友,夫復可求?

  話哂MK都只係一個人成長嘅其中一個階段,一日係MK妹,未必一世都係MK妹。可能佢同你一齊果陣係MK左啲,但如果你有心同佢拍落去,而佢又願意為你改變下或者定未來嘅目標,MK妹絕對係一個可以變成女神嘅人。雖然佢地寫嘅嘢你會笑,但試問有咩男人唔想自己女朋友只為自己而濕?而且MK妹果種大情大性,敢愛敢恨其實比港女果種虛情假意,勢利眼光要好好多。當然唔一定個個MK妹都係未琢磨嘅寶玉,正如唔係個個港女都咁黑面一樣,但大家都唔好將MK妹完全定型,用返老土果句:比個機會人,比個機會自己。

一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MaoYanDe
TUMBLR:http://moyinday.tumblr.com/  
Fanpiece:http://women.fanpiece.com/moyinday/
圖片來源:網絡取材,自行加工。
標籤: 毛言地  MK  愛情  

留言


請按此登錄後留言。未成為會員? 立即註冊
  • wyanki 於 19/04/2016 評論 NO. 1

    64。

快捷鍵:←
快捷鍵:→