你憑咩話自己「穩定交往中」?

毛言地 於 27/10/2017 發表 收藏文章
  好多人拍拖第一時間做嘅除咗喺放相,就係喺Facebook轉感情嗰一欄嘅關係。如果你用嘅係中文版,你會見到你感情係更新為「穩定交往中」,大家見到自然會恭喜你脫離單身。
 
 
  不過,你又有幾肯定依段關係真係穩定?
 
 
  要過熱戀期好易,喺你放個屁佢都覺得香嘅情況之下要快樂要恩愛真係多多都有。每晚傾幾個鐘電話、食個飯都唔捨得埋單、尾班車就開都唔肯講拜拜、我愛你連講十次都唔知個羞字點寫,晚晚都咁做你話就係最穩定嘅證明。但你可以保持熱戀期去幾耐?如果有半年都已經好利害。大部份情侶喺半年之後仲做唔到互相理解同體諒嘅話,分手只係遲早嘅事。
 
 
  唔係我想潑你冷水,但穩定唔係你地每次都難捨難離,而係就算要對住大家三五七年,你都唔會有作嘔嘅感覺。穩定依個字好保守,就算一場波去到八十分鐘主隊贏緊三比零,講波嘅人都唔會肯定話主隊贏硬,更何況你而家只係比賽啱啱開始?最近我識嘅一對男女就過唔到七年之癢,一段咁多回憶嘅感情都落得分手收場,拍咗拖七日都冇你就話穩定交往,實在太高估自己,太低估感情。
 
 
  當你唔係見少佢一眼就唔安落,而係大家會定一個穩定嘅見面時間;當你唔係成個腦都只有佢,而係將佢變成一常生活一部份;當你唔需要高調喺社交網絡哂恩愛,而係大家一早將你地分類成不可分割嘅一對,或者你地嘅關係就真係開始穩定——或者而已。
 
 
  至於你嗰個連一次朋友聚會都冇出現過嘅男女朋友?試用期都未話,又有咩穩定可言?
 
 
一個讚好,是對我的一點支持。
如果想分享給其他朋友的話,請標明出處並附上專頁網址。
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
圖片來源:網絡取材
標籤: 毛言地  愛情  感情  社交  穩定  交往  

留言


請按此登錄後留言。未成為會員? 立即註冊
    快捷鍵:←
    快捷鍵:→