你仲信依堆「原來是」?醒啦喂。

毛言地於 20/09/2015 發表 收藏文章
  每日打開FB,一大堆乜野十大好男人條件啊,完美男人標準既相關文真係一版都係。一開始我都好奇入過去望下,但過左一段時間後我就諗到底有冇人真係會照住黎做,或者以為做到果十樣野你就變左一個完美既男人。我唔會話佢地講既野係錯,但部份條件好明顯係港女級既女人一廂情願,又或者唔係個個男人都適合做。每個人最吸引人既地方都唔同,如果個個跟住依堆換湯不換藥既網絡文章黎做,我實在睇唔出你會有咩加分既地方。想拍拖?想對女朋友好啲?醒啦喂,睇依堆文冇用架。

  有睇過既朋友唔難發現大部份文應該係出自女人手筆。點解咁講?係文中既男人基本上係為左個女人而生:有錢比哂你洗、全副心思對著你、為左你付出一切、永遠將女朋友既說話一句不漏咁記住、未出聲個男人就知你想點。當然明眼人一睇都知冇可能,男人都有朋友、都有佢既興趣、都有自己應有既私人時間。女人係要比人錫,但亦都應該識得錫自己。如果拍拖之後乜野都指意哂男朋友的話,不如搵個保母返黎?

  每個男人有唔同特點,而每個女人鍾意既類型都唔同。可能依位覺得男朋友細心乜都為自己諗好哂好正,但果位反而會覺得你係咪當佢弱智,我食咩我鍾意自己揀。依個世界冇戀愛天書,冇話邊樣野個個女人都一定鍾意(除左錢,我諗)。就算係花我都遇到一個真係唔鍾意收到既女仔(有人送比佢係當場扔落垃圾桶),所以想追女仔從來都係係佢身邊既朋友度套料,上高登問通常都係多餘,更何況係依堆千篇一律既文。

  想搵女朋友既應該係由擴闊圈子開始,想對女朋友好啲都應該多啲留意下你女朋友。上網睇果堆靠你點擊入去然後等收錢既文章直頭係多餘,唔好再睇啦,更加唔好SHARE,我唔想第日一開個FB又係一堆依類既文,我寧願睇球迷世界好過。
標籤: 愛情  好男人    
《繼續吹》丁可欣Yanki - 心理測驗?So What!?

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→