「不如我地做返朋友？」 精選 推薦

　　依個世界上冇咩比依句更難聽。
　
　
　　拍拖，係因為你愛對方；分手，係因為你已經對佢冇感覺。依頭話分手，然後補返句「不如做返朋友」，其實對對方嚟講只係代表你喺段感情冇付出過——你覺得做返朋友只係身份上嘅改變，你根本唔覺得有咩問題。
　
　
　　點解一個人分手後心情咁差咁低落？因為你個心亂到根本唔個點表達你當下嘅情感：你仲愛住佢，但又恨佢嘅無情；你想眼不見為淨，但又無時無刻都掛住，喜怒哀樂一下子出哂嚟嗰種感覺好似你糖鹽油醋乜都溝埋一齊嗰種都唔知點形容嘅味道。偏偏佢講「不如我地做返朋友？」係幾咁寫意幾咁輕鬆，甚至好似有種甩難嘅感覺，你根本唔覺佢有不捨過留戀過，佢根本唔明友情同愛情係幾咁唔同：友情可以進化，但愛情唔識退化。你幾時見過人類會變返做猩猩？　
　
　　冇錯，有人分咗手可以做返朋友，但通常都係兩個人分咗手一兩年咁啱撞返傾下兩句，好少少咪一年出嚟食幾次飯。又或者跟本大家一齊嗰陣都冇上心，純粹求下開心，好聚好散咁。如果真係愛過痛過，分手後除咗陌路人依條路根本冇其它選擇，藕斷但又絲連咁咪只會令人痛足一世。分手後最好嘅方法應該係唔好再見，同公司嘅轉工、同區嘅可以搬屋、你話怕香港細會撞到移民都冇問題、大不了離開埋依個世界，但做返朋友依幾隻字真係最噁心。
　
　
　　你可以玩人感情、你可以騎牛搵馬、你可以當對方Just Like Shit，但最起碼尊重下對方為你付出嘅感情，尊重下對方嘅愛，分咗手咪好好消失喺對方面前唔好獻世。唔好以為話做返朋友好人道，比你飛仲要人地強顏歡笑對住你，你另結新歡又要聽到你地去邊旅行玩啲咩，最後迫到要比你飛嗰個逃離返你嘅視線，佢就真係多得你唔少。　
　
　　做返朋友？唔好啦，留返第日你要做帛金先好搵我。
　
　
一個讚好，是對我的一點支持。
如果想分享給其他朋友的話，請標明出處並附上專頁網址。
FACEBOOK：https://www.facebook.com/MOYINDAY
TUMBLR：http://moyinday.tumblr.com/
Fanpiece：http://women.fanpiece.com/moyinday/
圖片來源：網絡取材