《三號同學,你有冇拍緊拖啊?》

毛言地於 03/03/2018 發表 收藏文章
  如果你噚日問我人生最爽嘅事係咩,我一定係答你可以瞓到自然醒;但如果係而家問我,我會話係考個唔會影響到你嘅試。多得政府免費考DSE,我依個淨係考過會考嘅人總算可以一嚐考DSE嘅滋味。
 
 
  五個人圍半圓坐低,研究今日小組討論嘅題目《一夜情是否一個觸犯道德的行為》。望望其餘四個人,睇嚟除咗我同個三號女仔係貪得意報考,其餘三個都真係中學生。三號嗰把淺啡色長髮自然咁散落喺兩邊膊頭,配埋化咗淡妝嘅面孔,唔洗出聲都足以影響另外三位學生哥。點解我咁肯定?佢地平均每三秒就望一望個女仔,點樣專心去諗一陣講乜?
 
 
  專登嚟恰學生哥,真過份。
 
 
  喺每人講過自己立場同觀點之後,大家好快就進入討論環節。依組冇人唔出聲,亦都冇人壟斷發言,水準比我會考嗰陣真係好好多。
 
 
  「我唔同意一號同學。一夜情雖然有違大眾對愛情嘅定義,但同樣係大眾接受嘅行為。大多數人對一夜情嘅負面印像係嚟自出軌同派帽等背叛行為,但唔應該因為依種連帶關係而影響你對一夜情睇法。有違道德係出軌,而唔係一夜情本身。」我覺得依下駁得佢好完美。
 
 
  「我都同意五號同學。」三號講完之後望住我笑一笑。
 
 
  「三號同五號同學係咪因為本身就鍾意一夜情,所以放咗個人觀感落去?」唔知一號係咪嬲得濟,居然咁樣講嘢。
 
 
  「啊一號同學,一件事唔係話冇問題就要做。正如你話拍拖冇問題,一夜情就過份,咁你拍拖未?」依句真係精彩,一號同學之後就冇出過聲。我原本真係諗住咁講,點知比三號搶咗。
 
 
  「三號同學。」我唔知佢叫咩名,所以只可以咁叫佢,然後遞起隻手指公。
 
 
  考完之後,我去咗個廁所,然後沿住樓梯離開間中學。就喺門口我又見到三號同學嘅身影,我突然間有一種感覺,我唔叫住佢嘅話,我一定會後悔。
 
 
  「三號同學,你肚唔肚餓啊?一齊食個飯好嘛?」
  「考完試啦,仲叫我三號同學。」佢個笑容真係冇得頂。
  「我唔知你個名嘛。」
  「Bee,你叫我Bee啦。」
  「咁食唔食飯先三號同學?」我都係覺得依個名好聽啲。
  「好啊,行啦。」
 
 
  一陣餐飯,我一定要同佢討論下「三號同學有冇拍緊拖」依個題目先得。
 
 
FACEBOOK:https://www.facebook.com/MOYINDAY
TUMBLR:http://moyinday.tumblr.com/
Fanpiece:http://women.fanpiece.com/moyinday/
Medium:https://medium.com/@moyinday
標籤: 毛言地  愛情  口試  FF  DSE  
《繼續吹》丁可欣Yanki - 心理測驗?So What!?

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→