煮飯仔《男人有話兒 15》

男人有話兒 於 03/08/2017 發表 收藏文章
一個好既女朋友應該入得廚房,出得廳堂。識煮野食係好重要。
二十年前就係!
今時今日,男朋友對女朋友既祈望就只係希望女朋友遠離廚房,免得佢炸咗個廚房。

但係就算我地已經唔再介意女朋友唔識煮野食,有時女朋友都依然會興致大發想一齊煮下野食。
咁作為男朋友當然要捨命陪君子啦。但係每一個落廚既女朋友都會當自己係愛迪生。
到底女人知唔知道點解呢個世界要發明食譜?食譜就係俾一啲唔識煮野既人跟住做。
當你需要睇食譜既時候,證明你應該依住上面講既步驟一步一步去跟足佢。
識煮就唔洗睇食譜啦!睇得食譜姐係你唔識煮,甚至你第一次煮。跟住煮都已經未必好食,但起碼安全,何況你睇完食譜之後就開始自己亂黎。
所以麻煩各位女士,為咗男朋友既健康著想,係煮野食既時候,千祈唔好自己發明一啲步驟,亦唔好做任何未經許可神秘實驗。
我知女仔好鐘意食朱古力,但中菜加咗朱古力,溶埋一舊之後,個樣真係唔太開胃。
唔知點解,女人係死都唔係乖乖地跟食譜。
-----等等!先停落黎click入柳臣 fb page俾個like支持下,再繼續睇落去啦-----

其次係雖然屋企好細,唔會每一種材料都有,但食譜唔係應該係開爐之前睇先架咩!係煮之前,睇咗食譜,買齊需要既調味料先。唔好煮到一半,「咦?無檸檬喎?落啲醋代替啦!得既無事既!反正都係酸酸地!你信我啦!」
如果真係得,上帝就唔會創造檸檬同醋兩種食材啦!
當然柳臣係從來都無成功阻止過女朋友既惡行。最後每一次佢都會話「你唔好糟!我煮!你負責食得啦!」就將我趕咗出去。
然後係廳睇住個廚房愈黎愈大煙,腦裡面不斷重播住佢最後一句「我負責食。我負責食。我負責食。」

我相信係不久既將來,每一個男人都會學識煮野食。又或者在這之前,應該先考慮吓裝修時順便拆咗個廚房佢?
標籤: 下廚  女朋友  煮飯  食譜  煮餸  

留言


請按此登錄後留言。未成為會員? 立即註冊
    快捷鍵:←
    快捷鍵:→