如果用過馬路比喻追求異性,最緊要識得睇紅綠燈 文字

男人有話兒於 14/09/2017 發表 收藏文章
歌仔都有得唱:明明綠燈轉眼變成紅燈,如果唔識睇燈,撞死都唔抵可憐。
過馬路你都識睇燈先過啦,偏偏係愛情路上,好多人都唔睇燈,盲舂舂衝出去,撞到自己一身傷,然後反而係度問點解。

安全守則第一條:
企係馬路邊,見到綠公仔先好過馬路。
追求異性唔係斑馬線,對方唔會中門大開隨時都開放任何人去追求佢。如果你連燈都唔睇,就一枝箭咁衝出去,你俾車撞死既機會率係高達八成。
所以第一樣野係有耐心,冷靜落黎等佢轉燈,當佢對你開綠燈既時候,把握機會過馬路,先係安全同合理既做法。

咁但係又會有人抱怨:「喂!唔係喎!我企咗係路邊幾個月啦喎!佢都無轉過燈喎!咁點啊?」
咁你就要諗吓,會唔會係你未撳個個電子行人過路裝置啊?黃色個個呢?
有啲馬路可能係平時少人行既路,所以要你主動撳掣,佢先會知道有人企咗係度。
呢種抱怨唔轉燈既人係追求異性既時候剛好同心急衝燈既人相反,佢地太有耐性。
等唔係錯,但係唔可以忘記咗「追」都好重要,你要佢轉燈俾你過,你都要俾佢知道你對佢有好感先得架!你唔係自己有好感喎,係表達出黎喎!
唔係你企係馬路旁幾年,佢都唔知你原來係想過馬路,佢只係覺得有個奇奇怪怪既人一直企係馬路邊唔知做咩,咁咪搞笑?

再下一步啦,又會有啲人好肯定咁同柳臣講:「撳咗啦!撳到爛啦!佢一啲反應都無喎!係咪壞咗啊?」
見到呢啲人,柳臣多數都會望一望佢,然後笑佢撳錯掣。你撳咗俾視障人士聽個個喎!又或者你做咩係度猛拍條柱?

明唔明?好多人就係唔睇燈,唔撳掣,又或者直頭撳錯掣。
仲有最後一點,睇燈都唔係個個識睇,因為每個人既綠燈訊號都唔同,有啲係公仔,有啲係用顏色,有啲有三個燈號,有啲甚至有四至五個燈號。
唔同國家燈號都唔同啦,何況追求異性係講緊每個人都唔同?你知唔知佢既綠燈訊號係咩先?
會唔會俾已經俾咗綠燈但你仍然無動於衷?又或者佢已經亮起咗紅燈你仲唔識死?

最後,柳臣交通部提提大家:
如果用過馬路比喻追求異性,最緊要識得睇紅綠燈。
馬路如虎口,交通規則應遵守,安全第一命長久~

留言

會員
我要評論
請按此登錄後留言。未成為會員? 立即註冊
  • ak58
    ak58 於 16/09/2017 評論 NO. 1

    明明綠燈 轉眼變成紅燈~~~~~~~

  • Oscar Leung
    Oscar Leung 於 17/09/2017 評論 NO. 2

    Felix Li

  • Ho Yin  Chan
    Ho Yin Chan 於 17/09/2017 評論 NO. 3

    永恆紅燈點算好

快捷鍵:←
快捷鍵:→