點解講左好多次分手,仍然要繼續同男朋友一齊? 文字

紙情 兩性專欄於 18/09/2017 發表 收藏文章
讀者問我點解仲要繼續同男朋友一齊,其實每次當我同男朋友鬧交就會問自己:「點解我會同佢一齊?拍拖既意義又係乜野?」


我地鬧交鬧到好僵嗰陣我會包拗頸,明明個心好掛住佢,把口就會叫佢走:「你好黑人憎,我唔想再見到你!」雖然有幾次難過到想分手,不過事實上我想佢好野蠻地挽留我...因為以前既回憶又會開始湧出黎,我好怕以後都冇機會咁開心。

啱啱一齊既時候就算每日見都覺得唔夠:「我好掛住你呀!我地13個鐘冇見喇~~」成日想個天比多啲時間我同佢,手機裡面既相全部都係我地既合照,有啲係樣衰相特登留返黎笑佢,有啲係唔同動作既連環圖。就算夾定著情侶衫都唔會尷尬,走出街仲覺得好威:你睇,我有男朋友喇!怕自己唔記得仲會拎簿仔,寫低我地發生過既事、去過邊度、努力學整野食,只係想聽到佢讚我好叻女。

同佢一齊好多好無聊既野都會變有趣,例如見到條友個頭得返幾條頭髮,會用黎笑佢第日都會變成咁,指住佢喺條街度大笑....其實得自己一個嗰陣根本唔會留意到嗰個人。有時我覺得自己太認真,係個好悶既人,但佢可以冇啦啦氹到我笑,又會識欣賞我啲爛gag。我訓緊覺冇化妝、食到成個口塞滿曬野、撩鼻屎,喺人地眼中都可能好核突,只有佢會讚我好得意、好可愛、想攬住我。

以前唔開心得自己一個面對,依家無論咩事佢都會企喺我嗰邊,正正因為呢點令我可以安心依靠佢,唔驚比人蝦。喺佢面前先可以無拘無束咁做自己,因為佢唔會笑我低能,仲會比我更加低能。佢會放縱我既食量,夜晚明明已經食左飯,講笑咁問佢想唔想食宵夜,佢又會即刻call m記外賣,一路睇鬼片一路食。食完懶唔想dum野,好任性咁攬住佢唔比佢走,又開始傾偈傾到太陽都出黎,呢種平凡既生活好幸福。

去到某個位唔知點解總係中意挑剔佢,冇之前咁識得包容佢,好易發脾氣。我知一發脾氣,我喺佢心裡面個分又扣咁啲,我唔知邊日會扣到一分都冇;但同時我驚自己唔講出黎,又會一直扣佢分。冇錯每次鬧交都想一輪咀話佢,唔再同佢聯絡,唔聽佢電話...不過我知道我會後悔,我唔係同佢鬥氣,我係同自己鬥氣,內心想繼續一齊,點解就係講唔出口呢?

終於的起心肝搵佢,見到佢個樣先知就算出現條件幾好既男仔,始終都唔及男朋友,佢比我既感覺係無可取替。難過既時候係有,但係開心既時候更多,兜兜轉轉我知道我點揀都會揀佢。
_________________________________________________________________

如果中意我既文可以去我Instagram :lovestoryhk
或者like我facebook fanpage:紙情Lovestoryhk
/定期更新愛情文章架,多謝支持/


_________________________________________________________________

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→