愛情信箱18:前度讓左比兄弟,心裡其實好難受

紙情 兩性專欄 於 07/09/2016 發表 收藏文章
問題:

就咁嘅,我中意左個女仔差唔多有5年但係一齊左只有1年幾左右。我同個女仔都離離合合過幾次,分手嘅原因都係因為多鬧交,但係最後一次分手係因為個女仔同第二個男仔似拍拖多過我同個女仔拍拖。身邊好多朋友都話唔值得我去中意佢,飛左佢啦。雖然我真係好中意佢但係我真係過得好辛苦去到最尾都係要分手,我原本以為我可以好快放得低,但係一直仲好掛住佢。

最後一次分手之後冇耐,我聽身邊啲人講個女仔中意左我個兄弟。果陣我個兄弟同我講:「放心啦,我絕對唔會中意佢唔會同佢一齊。」但係果陣嘅我唔想比任何人知我仲未放低佢,就話:「去馬啦,有機會喎。」就係呢句野,冇幾耐之後我個兄弟同我講:「我地一齊左。」果一刻有一種感覺係個心縮埋左一舊,但係果陣我又唔可以比佢知我仲未放低,我笑住咁講話:「咁未好囉!」

我同果個兄弟日日一齊番工,佢同個女仔whatsapp果陣唔知傾啲咩響到問我應該傾啲咩,唔知買邊一對情侶鞋又問我,唔知同果個女仔出街去邊響到問我應該去邊。我果陣一直扮笑扮開心咁答佢所有野真係好辛苦,我仲好掛住個女仔,我真係好中意佢,唔係我唔想放低唔捨得放低,而係放低唔到我個心好似中左毒咁,不斷叫自己唔好諗唔好再中意佢,比左好耐時間自己,但係都放低唔到。我日日都要戴住面具咁對住佢,又好想番轉頭,我可以點做。

_______________________________________________________________________________________

回覆:
我覺得你一開始就應該要同兄弟講,我明白男人都係咁,個個考慮到兄弟既感受就忽視自己,但係你啱啱先分手,咁樣對你完全係一個折磨。到左呢刻你其實已經唔使怕講出黎會影響佢地,所以大膽同兄弟講你既難受點啦!佢唔為意,最後只會繼續同你講佢地既事。不過我覺得兄弟都有好大責任既,正常係唔應該問你,畢竟你先啱啱分手,又同過呢個女仔拍拖,問你又好奇怪。

至於你話放低,我希望你會珍惜呢段時間去做特別既事:

係時候要去做之前未做過既野,突然間揹起背囊去安全既旅遊景點闖蕩一下,用相機記錄當地壯麗既景色。你會發現原來以前既自己被愛情困住左,呢個世界真係好大好靚,沿途靠自己解決旅程中遇到既困難,先知道你既內心比起想像中更強大。
以前既你曾經有咩興趣架?有咩係你一直想去做而未試過?有人話:「我一直好想學鋼管舞,但..佢唔中意」咁依家就係一個好時機去報名學鋼管舞。嘗試發掘自己想做既野,叫埋朋友一齊玩更加賺左相處既時光。

一段感情完結未必代表付出係冇回報,要人愛你不如先學習點去愛人,主動成為一個義工幫助呢個社會有需要既長者同弱能人士,或者中意小動物既可以做動物機構義工。即使你同佢地只係傾下偈、玩遊戲,佢地都會懷住滿足既心,呢種感情對你黎講唔係仲有價值咩?

最後我鼓勵你寫或者講你既心情出黎,因為你會舒服好多好多,唔好將感受積積埋埋,否則會更唔開心,祝你搵到人生另一番意義。


留言


請按此登錄後留言。未成為會員? 立即註冊
    快捷鍵:←
    快捷鍵:→