就算佢冇講分手只係唔想做衰人,唔好因為愛佢而繼續死忍 文字

紙情 兩性專欄於 06/04/2018 發表 收藏文章
之前講過點同另一半講分手比較適當,咁如果係另一半希望離開呢?無論拍拖時間係長定短,你都曾經愛過對方,同佢建立好多回憶,可惜愛情總係有變淡、有問題既時候,遇到以下呢啲徵兆要留意:


1. 成日唔覆你wtsapp或者勁耐先覆,覆都係好敷衍咁一兩句

2. 你唔搵話題,你地就唔會交流,場面好尷尬

3. 相隔見面日子愈來愈長,見面時間愈來愈短

4. 佢對你毫不關心,講多幾句都冇乜耐性,一齊食飯都會話嘥時間

5. 同你出街心不在焉,只係掛住玩手機

6. 你想錫佢攬佢,佢會真心黑面,仲推開你話:嚇死人咩

7. 同你講不如比大家冷靜下

8. 態度轉差

9. 性格劇變,變極好或極壞,好似兩個人咁

10. 中意將責任推比你,借啲意發脾氣

仲有啲人更加離譜,為左唔想做衰人竟然做啲迫你分手既技倆。之前喺網上睇到一個故事覺得好嬲,講個女仔既男朋友偷偷地同左女同事去澳門旅行,最後返黎先比女仔發現佢地又玩又賭錢好開心。女仔質問時,男朋友竟然調返轉鬧佢:「我地又唔係做咩!去公幹之嘛!」係呀係幹呀,幹人地呀嘛!如果你忍到,佢就繼續同你拖住,之後搵機會再玩;你忍唔到就自己走,佢又唔使做衰人。


假如你用盡力氣都改變唔到對方,亦挽回唔到,任你繼續努力都只會受更重傷。你諗下當你拎住裝滿滾水既玻璃杯,熱到好痛係咪迫不得已要放手?愛情都一樣,受重傷,痛到極致,到時就會豁然放開,放過自己。我知突然變成一個人係件好痛苦既經歷,不過真正既愛唔可以夾硬黎,或者最後比你留到佢個身,但幸福咩?好好諗下有咩目標未做,等自己分手後唔好頹,要成為一個有價值既人。唔係拍拖、結婚、生仔先叫人生,搵自己中意做既野,去流浪又好、開鋪又好,唔會受人擺佈同影響先係真正既人生。

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→