另一半有煩惱向我呻可以點回應? 文字

紙情 兩性專欄於 07/09/2017 發表 收藏文章
香港人做野壓力太大,有好多野都受到不公平對待,例如工時、人事關係、工作量、技能等等,就算唔係返緊工/返緊學都好,平時生活上都會遇到唔如意既事。而呢啲不忿多數會透過埋怨去抒發出黎,好似我咁都會向朋友、男朋友狂呻,呢個時候問題黎喇,當你伴侶呻緊嗰陣,你可以比咩反應?

A.幫佢理性分析


B.比佢更加不理性


如果你選擇左答案A既話,抱歉你會獲得一個冷戰既機會......因為另一半既情緒已經好激動,同你講只係想埋怨一下,點知你仲要逐點分析佢做得好唔好。表面聽上去好似幫緊敵人咁,其實佢心諗:你係幫人地定幫自己?

選擇答案B既話恭喜你,你地既關係又更勝一步喇。所謂有福同享,有難同當,你能夠感同身受地企喺另一半既立場,代表你有將大家融為一體,當佢比人蝦既時候你比佢更嬲。

但假若你知道佢係無理取鬧又係咪應該繼續盲目地撐佢呢?其實你可以比佢更加激動,例如女朋友漏左行李喺機場度,職員死都唔幫佢拎上機所以佢發脾氣,你可以話:「我女朋友唔記得左之嘛,知唔知我係邊個?!我依家就去機場打死條友!」呢個時候你女朋友應該會撳住你,覺得你好體貼自己之餘又會因為你過激既行為反思自己 (當然你要知女朋友脾性先,免得一陣佢和應你去打人)
_________________________________________________________________

如果中意我既文可以去我Instagram :lovestoryhk
或者like我facebook fanpage:紙情
/定期更新愛情文章架,多謝支持/


_________________________________________________________________

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→