《這一個沒有未來的夢想還能維持多久?》

虐心者 於 30/06/2018 發表 收藏文章

琴日約左一個中學同學出黎,因為大家各有各忙嘅關係,洗日夾唔到時間出黎,所以一個月大概只有一至兩日約出來一齊唱吓K或者睇吓戲,總之就係想放鬆吓,又或者傾吓近排煩緊嘅野,因為太熟嘅關係,似乎有無窮無盡嘅話題。仲好記得幾年前我地依然仲係對夢想有期盼嘅青年,佢同我都好鐘意畫畫,而我認為佢畫畫嘅能力絕對係我之上。

自從中六畢業後,佢讀左個設計文憑課程,忽然就中途退左學,而我就一直寫文炒散,我記得佢講過佢曾經將自己嘅作品拎左俾一個學校老師睇,個老師狂用英文話佢畫得唔好,佢一直耿耿耿於懷,好唔開心,功課又多到乜咁,幾乎所有功課佢都冇得自由創作,要跟返客戶嘅要求,我諗可能因為咁樣,佢依家已經冇左之前對畫畫嘅果份興趣。

食完嘢之後,我陪佢去培訓機構報讀甜品製作員的課程,同往常一樣,我見到有畫畫課程報即刻狗沖去睇,仲二話不說嘔左成幾舊水去報,我問佢點解唔報自己鐘意嘅課程,而去報一啲唔鐘意嘅野。

佢:「報完我想行去睇甜品模型啊!」
我:「點解你唔報插圖course啊!我覺得你畫畫好靚啊,不如一齊報啊!」
佢:「唔......啦。」

我一直都唔明點解,點解佢要報一啲佢自己冇興趣嘅野,後來我大概知道答案了,因為甜品製作員嘅課程讀完之後會介紹你去其他公司就業,而插圖課程係讀完之後就咩都冇。

佢:「讀完會有就業機會,可以搵到工。」
我:「咁畫畫呢,你唔報畫畫呢!」
佢:「......,......」
我:「咁你會唔會幫我畫幾張圖上去IG?」
佢「......,......」

佢臉上浮出一副疲累的樣子,我開始懷疑到底係咩嘢可以侵蝕咗一個人嘅夢想,記得當年我們興緻勃勃,充滿熱情的去畫畫,現在只剩下我一個還在追逐一個不切實際的夢想,一個幾乎會餓死嘅夢想,無論我點樣勸佢,似乎佢已經決定放棄自己嘅興趣,可能佢真係諗得啱,我地需要嘅唔係一份搵唔到食嘅興趣,而係需要一份搵到食嘅工作,環觀香港的年輕人,何嘗不是每個人也曾經歷過放棄夢想這個過程,又有多少個人能夠勿忘初衷,堅持下去。

佢:「其實我哋年紀都唔細啦,要學識好好理財,為將來打算。」
我:「......,......」


我諗唔到佢竟然會講出呢句說話,睇嚟佢真係成熟咗,成熟到我覺得好不安,亦都開始質疑自己係咪應該放棄自己嘅夢想。報讀與就業有關的課程,然後全情去投入社會工作,咁樣先叫做為將來計算,而我依家到底算啲咩,夢想堅持久了也會累,這一個沒有未來的夢想還能維持多久。

Facebook page :虐心者

https://www.facebook.com/Lovemerry520/
標籤: 虐心者  關係  社會  未來  夢想  工作  散文  

留言


請按此登錄後留言。未成為會員? 立即註冊
    快捷鍵:←
    快捷鍵:→