大家都喺遇上仆街嘅輪迴入面努力

阿支阿佐摩洛哥 於 28/02/2018 發表 收藏文章
數數手指,原來今次已經係第七次。

小妹我同過三個男仔拍拖,同過四個女仔拍拖,年齡介乎由十六歲到廿九歲都有。
我係大概中學畢業就發現自己對女人反而更加有興趣。
唔好以為Lesbian就唔會係仆街磁石,自己同我身邊嘅朋友都覺得,我自己拍拖基本上都有一個Pattern,衰啲講係一個遇上仆街嘅輪迴。


每次失戀 ,我都會喊苦喊忽,然後就搵朋友講:

「啊好愛佢,點解佢會唔要我㗎,點解我永遠都要畀人玩呀,究竟我做錯啲乜嘢呀。」

搵完啲朋友鳩噏之後 ,就搵王菲,聽下佢啲歌係咁洗自己腦,覺得自己一個愛情嘅失敗者,好撚慘情咁樣 。

如是者喊咗兩三個星期,脂肪都喊埋出嚟嘅時候,個人又會開始醒醒哋,開始轉聽孫燕姿、蔡健雅啲歌,希望自己可以喺歌入面得到一啲所謂嘅正撚樣,有返少少骨氣,企番起身,搵自己心入面幻想嘅嗰個Mrs.Right。
但今次失戀有感覺少少唔同,我喺巴士聽住孫燕姿嗰首《我懷念的》。
以前每次失戀聽呢首歌例牌都會幾滴馬尿,覺得點解女朋友會咁快變心,咁容易放棄段感情,即使我喺佢身上花咗好多真心,花咗好多時間。

而佢一句話:「唔想拍拖啦,好攰啦。」

我以前付出嘅嘢乜柒都唔係。

今次聽孫燕姿《我懷念的》,覺得以前嘅自己好傻都好純情好天真。

追求我嘅人其實唔少,但我永遠都會鍾意上仆街。今次遇上咗一個大仆街啦,下次希望唔好再遇上仆街啦。
點知最後就會發掘更多唔同種類嘅仆街,慢慢我就成為咗一個仆街磁石。成日以為自己冇可能再咁黑仔啦,現實係個世上仆街你永遠都遇唔曬。

其實一個女人究竟會唔會得到幸福、搵到一個錫自己嘅人,
根本同佢心地善善良佢靚唔靚女唔關事,反而係睇你識唔識得自愛。

識得有一個女仔,
佢永遠都會搵到一啲對佢好好嘅男朋友,就算佢畀帽人帶都好。
佢好似永遠都唔會有任何嘅報應。
衰啲講我就係不停咁樣跌入仆街磁石嘅輪迴,而佢就係不停咁樣搵到唔同類型嘅筍盤 。

有另外一位小編曾經係佢專欄講過,
「我根本唔係恨佢嘅渣,甚至喜歡佢嘅原因就係因為佢渣味,所以我先會搵到另一個同佢一樣渣味濃嘅人。」
感情從來沒有一方是全對的。
人好多時都會畀自己嘅寂寞、性慾、渴望愛嘅心態擊敗,最後可能我哋可以得到咗一時嘅快樂,甚至自大低能到,有一刻以為自己可以成為童話書入面嗰啲開心小公主,最後變得越來越墮落,變成嗰啲唔相信愛情嘅怨婦 。

所有嘢都係講因果,可憐人自有可恨處。
你接受到自己為呢啲仆街放低自尊,都唔能夠怪自己得唔到幸福,因為你根本唔自愛。
未來嘅情路我可能都係一貫風格,鍾意西人。

不過今次我嘗試同自己講,

「可能我哋控制唔到對方係邊個,但我哋起碼可以控制到自己變成一個點嘅人。」

說罷,仆街磁石的我,又有了一股新幹勁。

留言


請按此登錄後留言。未成為會員? 立即註冊
    快捷鍵:←
    快捷鍵:→