20歲(恨嫁) 文字

情情塔塔於 20/04/2017 發表 收藏文章
話說小妹連21歲都未到,就已經有一顆恨嫁的心。不過今次呢篇文唔係想講我點解恨嫁,而係想講我隨便google下同結婚有關嘅詞語,見到彈出嚟啲results之後嘅感受。

首先我搵左擺酒,嘩,去ClubX擺酒都起碼一圍$7000起跳,去酒店擺酒就一圍$12000起跳。小妹我不嬲就唔鍾意entertain班親朋戚友嘅,如果可以,我直情唔擺酒呀。挑!諗諗下我老豆一定叫埋啲我連稱呼都唔知係乜嘅長輩去飲。仲有呀,我最憎啲喺人面前戴金豬乸頸鏈,真係當新娘係豬乸咁,生成隊足球隊出嚟咩?新郎又會懶驚喜加插下天才表演環節咁,明明我地結婚,點解我地要表演,自己賀自己?同埋嗰啲煽情到喊嘅童年片段呀,到時我喊唔出會點?播完,又要喺咁多人面前感謝老豆老母養育之恩。究竟係邊個搞到婚禮咁公式化?

跟住又搵下啲婚紗/晚裝租借嘅網。頂,諗起之前飲過幾次,新娘都不停換唔同晚裝出場。我開始懷疑給婚擺酒只不過係新人做比親朋戚友嘅一場show。啲新娘分分鐘仲百變過喺紅館開concert嘅女歌手呀。喂咪住,根本擺酒某程度上仲辛苦過開concert,開concert握手最多咪同幾十個歌迷握。新人去祝酒,圍圍都要去呀。埋到去啲三唔識七嘅親戚嗰圍,又會尷尷尬尬咁唔知講乜好。然後最攞命係畀人叫「嘴佢!嘴佢」,呢個時候,新人更似係海X公園啲海獅(定海狗呀?)。

明明結婚應該係值得一對新人開心嘅事,點解反而有咁多煩惱呢?依加搞咁多嘢$30萬走唔甩。$30萬,不如用嚟儲首期好過。不過買樓呢樣嘢,其實都係一個普遍價值嘅枷鎖?

點解一定要擺酒?點解一定要買樓?
標籤: 買樓  擺酒  結婚  恨嫁  

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→