我們改了姓,姓慕容。 文字

情情塔塔於 19/05/2017 發表 收藏文章
睇左《東邪西毒》,除左哥哥張國榮所飾演嘅「西毒」歐陽峰自卑得叫人痛心,林青霞所飾演嘅慕容燕/慕容嫣/獨孤求敗亦喺我心中留下深刻印象。

「一個人受到挫折,或多或少會找個藉口掩飾自己。其實慕容燕、慕容嫣,只不過是同一個人的兩個身分,在這兩個身分後面,躲藏着一個受了傷的人。」

慕容嫣因為黃藥師酒後嘅一句胡言亂語,而錯信對方真心愛上自己,於是成就左慕容燕嘅出現。慕容燕同慕容嫣,其實代表住內心嘅一種掙扎。慕容燕反對慕容嫣同黃藥師走埋一齊,因為佢知道真相會令慕容嫣傷心欲絕;慕容嫣反而堅信自己係黃藥師最愛嘅女人,似乎留一片餘地俾自己去FF一個好結局。

或者大家心裡都住過一對姓慕容嘅兄妹。可能大家都睇得太多偶像劇,以為奇蹟會降臨喺自己條感情線上,夾硬將一廂情願嘅事實翻譯成「99%機會係一廂情願,即係有1%機會係兩情相悅啦」。然後經過一番沉澱,又認清返個事實係如何。好可惜,呢兩個步驟已連接埋一齊成為一個不斷出現嘅圈套。

慕容燕/慕容嫣最後化身成獨孤求敗,對住自己嘅倒影練劍。咁究竟佢有冇逃離頭先提及到嘅圈套呢?好難答,只可以肯定嘅係呢個局面係由個圈套引致而成。只有自己嘅影子可以永遠陪伴自己,成為同自己練劍嘅好對象。同樣地,對大家而言,只有自己最懂得如何珍惜自己,所以唔再怕孤身一人。

今日我同朋友講左句「習慣左孤單,就唔會覺得孤單係孤單」,可能一個人孤單嘅時候,比起戀來戀去可以接收更加多嘅愛。可能慕容燕/慕容嫣痛恨自己得唔到黃藥師嘅愛,先將自己塑造成獨孤求敗,為自己奉上愛。
標籤: 東邪西毒  獨孤求敗  王家衛  

留言

會員
我要評論
請按此登錄後留言。未成為會員? 立即註冊
快捷鍵:←