只愛陌生人 文字

情情塔塔於 27/04/2017 發表 收藏文章
王家衛嘅戲,小妹前前後後暫時睇左五部,而當中最淺白易明係《重慶森林》。

其實套戲我只係睇左一次,但久唔久會思考下套戲帶出嘅意思係乜。當時睇完覺得阿菲同樣663嘅故事比較吸引,而且俾到觀眾好大嘅FF空間。例如我,可以FF下入男神間屋幫佢打掃,然後被佢揭穿,最後抱得美男歸。點解我會冇咁鍾意223同女犯人個故事?可能我當時覺得223太隨便,求其有個女人入左酒吧,就搏命媾佢。

但後來再諗深一層,加埋同朋友仔討論,就得出其它結論。

首先講講223同女犯人個故事。其實由頭到尾223都仲未算係忘記到個ex,或者應該話就算當佢忘記到喇,佢都一樣仲生存喺愛情嘅圈套當中。佢求其搵個女人去媾,目的係為左忘記個ex。但我相信大家都明啦,咁刻意做呢啲動作,咪即係代表223依然未釋懷。223收到女犯人句生日祝福,又話希望呢段記憶係個保存到一萬年嘅罐頭。喂,點解係罐頭先?因為佢ex鍾意食罐頭菠蘿呀嘛!喺佢心目中,罐頭可能喺故事開始前已經象徵住記憶。佢由愚人節開始一日儲一個五月一日到期嘅罐頭,睇下個ex會唔會搵返佢,設一個期限俾呢段感情。但好明顯,個期限設左又點?對223嚟講,只有罐頭象徵住記憶。點解係一萬年?「愛你一萬年」係223 call台密碼,好明顯係同個ex仲一齊嘅時候set架啦!223因爲放唔低先變得隨便,想搵個陌生人寄託情感,我諗唔少人都試過吧?

咁阿菲同663呢?呢個故事根本就令大家FF症惡化,尤其係劇情好生活化。男神就一向可遠觀而不可褻玩焉。但大佬,日日去男神屋企打掃喎,下世都未有機會啦!加上只不過係咁啱663分左手,阿菲先有一線機會進入到663嘅世界(我唔會話阿菲有機可乘,因為好明顯阿菲選擇喺背後為663做咁多事,係因為佢唔期待得到663嘅愛,的確冇諗過褻玩)。又試問有幾多人會唔希望得到夢中人嘅愛呢?大家約喺「加州」等嗰時,阿菲受寵若驚選擇左去真・加州兼且做一年空姐。究竟阿菲係真係嚮往加州生活,定係因為663熱愛喺25000英尺高空中媾空姐?可能係小鹿亂撞未定驚,可能係想663好似佢咁為自己做返咁多?不過無論如何,最神奇嘅係663呢位男神居然肯喺唔知阿菲幾時搵返佢嘅情況下等阿菲。

有時大家以為愛陌生人好似好隨便咁。事實上除左親戚同屋企人,其它關係都係由陌生人身為做起點。但究竟大家係利用陌生人去自我慰藉,抑或係真心真意仰慕一個陌生人,一見鍾情呢?又或者由對方對自己一見鍾情衍生至自己對對方日久生情?

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→