見家長真係好恐怖

90sCouple 於 05/02/2018 發表 收藏文章
(圖片來自互聯網)

每對情侶一齊有一段時間,
都必須要經歷見家長呢個步驟。

「驚」,相信每一個人見家長都會。
驚講錯說話;
驚比人問長問短:
驚伴侶家長唔鍾意自己;
但有時候,
避得一時都避唔到一世,
點都要去面對。

仲好記得,
當時同女朋友一齊未夠一年,
就已經見咗家長。
事關佢地一直都好想見我,
只係我太驚推咗好多次。

一知道話要見家長,
我都即刻發揮起底功能。
問女朋友佢地平時係點、政治立場、興趣…
當然有問埋佢地平時點講我啦!

上去食飯之前,
特登同女朋友去揀買乜上去見面最適合。
當時知道佢地鍾意飲茶,
就買咗一罐茶葉上去。
當時嘅感覺就好似行去刑場一樣,
準備受死。

入去之前,
女朋友提我記得嗌人。
一見面,
即刻嗌「Uncle、Auntie」!
因為呢樣實在太緊要,
如果唔記得嗌,
相信你嘅第一印象已經可以直落谷底。

之後準備食飯都有問洗唔洗幫手之類,
佢地當然話唔洗啦!
食飯中途當然都不外乎係問同一類嘅問題。
「呀晉,第時有冇話想返啲咩工咁呀?」
「呀晉,你屋企遠唔遠架?係邊度架?」
「呀晉,係呢…點解會同我個女一齊嘅?」
一連串好似審犯嘅問題,
我當然一早諗好所有答案,
確保唔會講錯說話。

中間都有夾下餸比女朋友,
做下細心同照顧到人,
讚下佢父母之類。
咁先可以令佢父母放心將個女交俾我。
食完飯,
坐到一陣就已經離開。
踏出門口一刻,
係心入面不停同自己講,
「終於走得,好彩冇事!」

之後果晚聽返女朋友講,
佢屋企人都覺得我唔錯。
聽完呢句,
就肯定安全了。

其實見家長,
不外乎都係果三方面值得要注意。

外表方面,
不論男女最重要都係要外觀端正,
衣著唔好太過「潮」或者太老套。
男即盡量唔好帶耳環、個頭七彩繽紛;
女嘅都唔好太過濃妝、帶太誇張嘅耳環。

說話方面,
記得要表現得非常有禮貌,
去到一定要嗌人。
去之前亦要諗定對方父母會問啲乜,
咁就唔會口啞啞!

行為方面,
就算對方父母話唔洗買嘢上去,
都一定要買!
可以的話就幫下手開飯、洗碗。

最要一點,就係身為男/女朋友嘅你,
一定要鼓勵對方,
增加信心!

希望小小經驗,
可以幫到大家,
祝大家見家長成功!


"90sCouple"將會繼續為大家分享不同故事,
希望大家多多支持~
標籤: 情侶  見家長  拍拖  關係  愛情  
《繼續吹》丁可欣Yanki - 心理測驗?So What!?

留言

會員
我要評論
請按此登錄後留言。未成為會員? 立即註冊
快捷鍵:←
快捷鍵:→